News Details

കഴക്കൂട്ടം: കേരള സർവകലാശാല കാര്യവട്ടം കാമ്പസിലെ അസിസ്റ്റൻറ് രജിസ്ട്രാറായ കൊല്ലം, മുണ്ടയ്ക്കൽ വാഴോട്ട് ആർ.രാജ് നാരായണൻ (52) കുഴഞ്ഞു വീണു മരിച്ചു. ഇന്നലെ രാവിലെ സുഹൃത്തുക്കളുമായി ബാഡ്മിൻറൺ കളിച്ചുകൊണ്ടിരിക്കുമ്പോൾ കുഴഞ്ഞുവീഴുകയായിരുന്നു. തൃപ്പാദപുരം കേരള ഹോംസിലാണ് താമസം. ഉടൻ തന്നെ സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല.

മുൻ കൃഷി വകുപ്പ് മന്ത്രി മുല്ലക്കര രത്നാകരന്റെയും, മുൻ റവന്യൂ മന്ത്രി കെ ചന്ദ്രശേഖരൻ്റെ അഡീഷണൽ പ്രൈവറ്റ് സെക്രട്ടറിയായും കേരള യൂണിവേഴ്സിറ്റി സ്റ്റാഫ് അസോസിയേഷൻ ജനറൽ സെക്രട്ടറിയായും പ്രവർത്തിച്ചിട്ടുണ്ട്.
സി.പി.ഐ നേതാവും കേരള സർവകലാശാല സിൻഡിക്കേറ്റ് അംഗവുമായിരുന്ന പരേതനായ പ്രൊഫ. വെളിയം രാജൻ്റേയും, കൊല്ലം എസ്എൻ കോളേജ് പ്രൊഫസർ പരേതയായ എൻ. രാജമ്മയുടെയും മകനാണ്.

ഭാര്യ സുജ കൊല്ലം, മീയന്നൂർ ശങ്കരമംഗലം ഹയർ സെക്കൻഡറി സ്കൂൾ അധ്യാപികയാണ്. മക്കൾ: രേവതി അയ്യപ്പൻ.
പരേതയായ രാജലക്ഷ്മി സഹോദരിയാണ്

മൃതദേഹം തിരുവനന്തപുരം മെഡിക്കൽ കോളേജ് ആശുപത്രിയിൽ പോസ്റ്റുമോർട്ടത്തിനു ശേഷം കാര്യവട്ടം യൂണിവേഴ്സിറ്റി കാമ്പസിൽ പൊതുദർശനത്തിനു വച്ചു. കാമ്പസിലെ വിവിധ ഡിപ്പാർട്ട്മെൻറുകളും, സംഘടനകളും അന്ത്യാഞ്ജലി അർപ്പിച്ചു. സർവ്വകലാശാലയുടെ വിവിധ രംഗങ്ങളിൽ തൻ്റെ പ്രവർത്തന മികവ് പ്രകടിപ്പിച്ച അദ്ദേഹം കേരള സർവകലാശാലക്ക് നാക് എ പ്ലസ് നേടുന്നതിന് കാമ്പസ് ജോയിൻ്റ് രജിസ്ട്രാർ എന്ന നിലയിൽ മുഖ്യപങ്കു വഹിച്ചതായി സംഘടനാ നേതാക്കൾ പറഞ്ഞു. കൊല്ലം മുണ്ടക്കലെ വീട്ടിലെത്തിച്ച മൃതദേഹം ഇന്ന് രാവിലെ പോളയത്തോട് ശ്മശാനത്തിൽ സംസ്കരിച്ചു.