News Details

ഇരുപത് വർഷത്തെ ചരിത്രത്തിലാദ്യമായി ബ്രിട്ടീഷ് എയർവേയ്സ് ക്യാബിൻ ക്രൂവിന്റെ യൂണിഫോമിൽ മാറ്റം വരുത്തുന്നു. പുതിയ യൂണിഫോമിൽ ഹിജാബ് കൂടി ഉൾപ്പെടുത്തിയിട്ടുണ്ട്. ഹിജാബ് അണിയേണ്ടവർക്ക് അതാവാമെന്ന് വാർത്താകുറിപ്പിലൂടെ ബ്രിട്ടീഷ് എയർവേയ്സ് അറിയിച്ചു.

അഞ്ച് വർഷമായി ബ്രിട്ടീഷ് ഫാഷൻ ഡിസൈനറായ ഒസ്‌വാൾഡ് ബൊട്ടെങ്ങിന്റെ നേതൃത്വത്തിൽ നടന്നുവരുന്ന പ്രവർത്തനങ്ങൾക്ക് ഒടുവിലാണ് ബ്രിട്ടീഷ് എയർവേയ്സ് യൂണിഫോം മാറ്റുന്നത്. കോവിഡ് മൂലം ഈ പ്രവർത്തനങ്ങൾ രണ്ട് വർഷം വൈകിയിരുന്നു. പുരുഷൻമാർക്ക് സ്യൂട്ടായിരിക്കും വസ്ത്രം. സ്ത്രീകൾക്ക് ഡ്രസിനൊപ്പം ജമ്പ്സ്യൂട്ടോ സ്കർട്ടോ ട്രൗസറോ ധരിക്കാം. ആദ്യമായാണ്, എയർലൈനുകളിൽ ജമ്പ് സ്യൂട്ട് ക്യാബിൻ ക്രൂ അംഗങ്ങൾക്കുള്ള വസ്ത്രമാക്കുന്നതെന്ന് ബ്രിട്ടീഷ് എയർവേയ്സ് പ്രതികരിച്ചു.

വേനൽക്കാലത്തിന് മുമ്പ് കമ്പനിയിലെ 30,000 ത്തോളം ജീവനക്കാർ പുതിയ യൂണിഫോമിലേക്ക് മാറും. ഞങ്ങളുടെ ബ്രാൻഡിനെ പ്രതിനിധീകരിക്കുന്നതാണ് യൂണിഫോമെന്ന് ബ്രിട്ടീഷ് എയർവേയ്സ് ചെയർമാൻ സി.ഇ.ഒ സിയൻ ഡോയലെ പറഞ്ഞു. ഞങ്ങളെ ഭാവിയിലേക്ക് കൂടി നയിക്കുന്നതാണ് യൂണിഫോം. പുതിയ യൂണിഫോമിലേക്ക് മാറുമ്പോൾ പഴയത് റീസൈക്കിൾ ചെയ്യുകയോ ഡൊണേറ്റ് ചെയ്യുകയോ ചെയ്യുമെന്നും ബ്രിട്ടീഷ് എയർവേയ്സ് അറിയിച്ചു.