പഞ്ചകർമ്മ ചികിത്സ ചെയ്യുവാൻ സാധിക്കാത്തവർ പകരമായി കർക്കടകത്തിൽ നിർബന്ധമായി  ഉപയോഗിക്കേണ്ടതാണ് കർക്കടക കഞ്ഞി. സാധാരണ കഴിക്കുന്ന ഭക്ഷണത്തിനുപകരം കർക്കടകക്കഞ്ഞി ഉപയോഗിക്കാം. 7, 14, 21 ദിവസങ്ങൾവരെയാണ് കർക്കടക കഞ്ഞി ഉപയോഗിക്കാവുന്നത്. കർക്കടക മാസം എല്ലാ ദിവസവും ഉപയോഗിക്കുകയും ചെയ്യാം. ഒരു നേരമാണ് കഴിക്കുന്നതെങ്കിൽ   പ്രഭാതത്തിൽ ഉപയോഗിക്കുന്നതാണ് നല്ലത്. രണ്ട് നേരമായാൽ അത്രയും നല്ലത്. പോഷണം ആവശ്യമുള്ളവർ ഞവരയരിയ്ക്കൊപ്പവും അല്ലാത്തവർ ഉണക്കലരിയ്ക്കൊപ്പവും ചെറുപയറും ആശാളിയും കൂടാതെ പഞ്ചകോല ചൂർണ്ണമോ (തിപ്പലി, തിപ്പലി വേര്, കാട്ടുമുളകിൻ വേര്, ശുദ്ധി ചെയ്ത കൊടുവേലിക്കിഴങ്ങ്, ചുക്ക്) ദശപുഷ്പങ്ങളോ (മുക്കുറ്റി, ചെറൂള അഥവാ ബലിപ്പൂവ്, ഉഴിഞ്ഞ, തിരുതാളി, പൂവാംകുറുന്നൽ, കറുക, നിലപ്പന, വിഷ്ണുക്രാന്തി, കയ്യുണ്യം അഥവാ കയ്യോന്നി, മുയൽചെവിയൻ) ചേർത്ത് കഞ്ഞിയുണ്ടാക്കി ഉപയോഗിക്കാം. ദശപുഷ്പങ്ങളിൽ ഏതെങ്കിലും ഒന്നു വീതം ചേർത്ത് കഞ്ഞി വയ്ക്കുന്നവരും ഒന്നിൽ കൂടുതൽ മരുന്നുകൾ ചേർക്കുന്നവരും പത്തെണ്ണവും ചേർത്ത് കഞ്ഞി വെയ്ക്കുന്നവരുമുണ്ട്.

ഇതിന് സൗകര്യമില്ലാത്തവർക്ക് മാർക്കറ്റിൽ റെഡിമെയ്ഡായി പായ്ക്കറ്റിൽ ലഭിക്കുന്നതും അതിലുള്ള നിർദ്ദേശമനുസരിച്ച് ഉപയോഗിക്കാം. ചിലയിടങ്ങളിൽ കഞ്ഞി തന്നെ റെഡിമെയ്ഡായി കിട്ടാറുണ്ട്. തേങ്ങാപ്പാൽ ചേർത്തോ അല്പം നെയ്യ് താളിച്ച് ചേർത്തോ ചെറു ചൂടോടെ വേണം കഞ്ഞി കുടിക്കുവാൻ. ചുവന്നുള്ളി, ജീരകം തുടങ്ങിയവ കൂടി ചേർത്താൽ ദഹനം വർദ്ധിക്കും. കർക്കടക കഞ്ഞിയ്ക്കൊപ്പമോ അവ സേവിക്കുന്ന ദിവസങ്ങളിലോ മത്സ്യമാംസാദികൾ ഒഴിവാക്കുന്നതാണ് നല്ലത്.

കർക്കടകത്തിൽ കഴിക്കുന്നതെന്തും എളുപ്പം ദഹിക്കുന്നതും ക്രമേണ നമ്മുടെ ദഹനശേഷി വർദ്ധിപ്പിക്കുന്നതും അതിലൂടെ രോഗങ്ങളെയകറ്റി ആരോഗ്യമുണ്ടാക്കുന്നതുമായിരിക്കണം.

ഡോ. ഷർമദ് ഖാൻ BAMS, MD,

സീനിയർ മെഡിക്കൽ ഓഫീസർ, ഗവ. ആയുർവ്വേദ ഡിസ്പെൻസറി, നേമം)

സംശയങ്ങൾക്കും മറുപടികൾക്കും 94479 63481 എന്ന ഫോൺ നമ്പറിൽ ബന്ധപ്പെടുക.

കർക്കടകത്തിൽ കഴിക്കുന്നതെന്തും എളുപ്പം ദഹിക്കുന്നതും ക്രമേണ നമ്മുടെ ദഹനശേഷി വർദ്ധിപ്പിക്കുന്നതും അതിലൂടെ രോഗങ്ങളെയകറ്റി ആരോഗ്യമുണ്ടാക്കുന്നതുമായിരിക്കണം