തിരുവനന്തപുരം: വിവിധ മേഖലകളിലെ സഹകരണ സാധ്യതകള് തേടി ഇന്ത്യയിലെ എസ്റ്റോണിയന് അംബാസഡര് മാര്ജെ ലുപ്പിന്റെ നേതൃത്വത്തിലുള്ള ഉന്നത വ്യവസായ പ്രതിനിധി സംഘം ടെക്നോപാര്ക്ക് സന്ദര്ശിച്ചു.
സന്ദർശനത്തിൽ ഇ-ഗവേണന്സ്, ഇ-ഹെല്ത്ത്, ബഹിരാകാശം, ദുരന്തനിവാരണം, വളര്ന്നുവരുന്ന സാങ്കേതികവിദ്യകള് തുടങ്ങിയ വിഷയങ്ങളില് സംസ്ഥാന ഇലക്ട്രോണിക്സ്- ഐടി സ്പെഷ്യല് സെക്രട്ടറി സീറാം സാംബശിവ റാവു ഐഎഎസ് എസ്റ്റോണിയയില് നിന്നുള്ള വിവിധ മേഖലകളിലെ പ്രതിനിധികളുമായി ചര്ച്ച നടത്തി.
കേരളത്തിന്റെ സേവന മേഖല രാജ്യത്തിന് മാതൃകയാണെന്ന് സീറാം സാംബശിവ റാവു ചൂണ്ടിക്കാട്ടി. ശക്തമായ സാങ്കേതികവിദ്യ ആവാസവ്യവസ്ഥ പ്രയോജനപ്പെടുത്തിക്കൊണ്ട് സ്വകാര്യ മേഖലയില് നിന്നുള്പ്പടെയുള്ള നിക്ഷേപം പ്രോത്സാഹിപ്പിക്കുന്നതില് സംസ്ഥാനം ശ്രദ്ധ കേന്ദ്രീകരിക്കുകയാണ്. സര്ക്കാരിന്റെ വ്യവസായ നയം പരിസ്ഥിതിസൗഹൃദമായ 22 മുന്ഗണനാ മേഖലകളെ തിരിച്ചറിഞ്ഞിട്ടുണ്ട്. എസ്റ്റോണിയയിലെ സ്റ്റാര്ട്ടപ്പുകള്ക്കും സര്വകലാശാലകള്ക്കും കേരളവുമായി ബന്ധം സ്ഥാപിക്കാനും ആശയങ്ങള് പങ്കിടാനും വലിയ അവസരങ്ങളാണുള്ളതെന്നും അദ്ദേഹം വ്യക്തമാക്കി.
എസ്റ്റോണിയയുടെ ഇ-ഗവേണന്സും സാങ്കേതിക സംരംഭങ്ങളും മാര്ജെ ലുപ്പ് വിശദീകരിച്ചു. കേരളം മറ്റ് പ്രദേശങ്ങളില് നിന്ന് വ്യത്യസ്തമാണെന്നും ഇവിടെ നടപ്പാക്കുന്ന ഇ-ഗവേണന്സ് പോലുള്ള സംരംഭങ്ങളില് വലിയ മതിപ്പുണ്ടെന്നും മാര്ജെ പറഞ്ഞു. സൈബര് സുരക്ഷയിലും എഐയിലും കഴിവ് തെളിയിച്ചിട്ടുള്ള കേരളത്തിലെ സ്റ്റാര്ട്ടപ്പുകളുമായും കമ്പനികളുമായും സഹകരണത്തിന് എസ്റ്റോണിയ താല്പ്പര്യപ്പെടുന്നു. കുറച്ചുകാലമായി എസ്റ്റോണിയ ഇന്ത്യയിലേക്ക് സ്റ്റാര്ട്ടപ്പുകളെ കൊണ്ടുവരുന്നുണ്ട്. കേരളത്തിന്റെ ഊര്ജ്ജസ്വലമായ സാങ്കേതിക ആവാസവ്യവസ്ഥയും ബഹിരാകാശ മേഖല ഉള്പ്പെടെയുള്ള വളര്ന്നുവരുന്ന സാങ്കേതിക മേഖലകളും ശ്രദ്ധേയമാണെന്ന് ചൂണ്ടിക്കാട്ടിയ മാര്ജെ ലുപ്പ് എസ്റ്റോണിയയില്നിന്ന് ഒരു സ്റ്റാര്ട്ടപ്പ് പ്രതിനിധി സംഘത്തെ അയയ്ക്കാനുള്ള സന്നദ്ധതയും പ്രകടിപ്പിച്ചു.
എസ്റ്റോണിയ ബിസിനസ് ആന്ഡ് ഇന്നൊവേഷന് ഏജന്സി എഫ്ഡിഐ ആന്ഡ് എക്സ്പോര്ട്ട് ഹെഡ് വിനോദ് ബസ് ലിയാല്, എനര്ജി ക്ലസ്റ്റര് പ്രതിനിധി സ്വെന് പാര്കല്, മാരിടൈം ക്ലസ്റ്റര് പ്രതിനിധി ജാക്ക് വിലിപസ്, ഹെല്ത്ത് ടെക് ക്ലസ്റ്റര് പ്രതിനിധി മാരിറ്റ് ജലാകസ്, വുഡ്ഹൗസ്/പ്രീഫാബ്രിക്കേറ്റഡ് ക്ലസ്റ്റര് പ്രതിനിധി മാര്കോ വാലര്, ഫിലിം ഇന്ഡസ്ട്രി പ്രതിനിധി ആന്റോണ് ഇല്ജിന് എന്നിവര് പ്രതിനിധി സംഘത്തില് ഉണ്ടായിരുന്നു.
ഡിജിറ്റല് യൂണിവേഴ്സിറ്റി കേരള വൈസ് ചാന്സലര് ഡോ. സജി ഗോപിനാഥ്, കേരള സ്റ്റാര്ട്ടപ്പ് മിഷന് (കെഎസ്യുഎം) സീനിയര് മാനേജര് അശോക് കുര്യന് പഞ്ഞിക്കാരന്, കെഎസ്ഐടിഎം ഇ ഗവേണന്സ് ഹെഡ് ശബരീഷ്, കെഎസ്ഐടിഎം ടെക്നോളജി ഹെഡ് സുബില് വി.എസ്, ഡി.യു.കെ പ്രൊഫസര് ഡോ. അലക്സ് ജെയിംസ്, സി.ഡി.ഐ.ടി ഡയറക്ടര് ഡോ. സുനില് ടി.ടി, ടെക്നോപാര്ക്ക് മാര്ക്കറ്റിംഗ് ആന്ഡ് കസ്റ്റമര് റിലേഷന്ഷിപ്പ് ഡെപ്യൂട്ടി വൈസ് പ്രസിഡന്റ് വസന്ത് വരദ, ലീഡ് ഐടി സ്ട്രാറ്റജിസ്റ്റുകളായ ഡോ. അനൂപ നാരായണന്, ശ്രീനാഥ് ജ്ഞാനേശ്വര്, അക്ഷയ് കണ്ണന്, പ്രകാശ് മാത്യു എന്നിവരും പങ്കെടുത്തു.
സന്ദർശനത്തിൽ ഇ-ഗവേണന്സ്, ഇ-ഹെല്ത്ത്, ബഹിരാകാശം, ദുരന്തനിവാരണം, വളര്ന്നുവരുന്ന സാങ്കേതികവിദ്യകള് തുടങ്ങിയ വിഷയങ്ങളില് സംസ്ഥാന ഇലക്ട്രോണിക്സ്- ഐടി സ്പെഷ്യല് സെക്രട്ടറി സീറാം സാംബശിവ റാവു ഐഎഎസ് എസ്റ്റോണിയയില് നിന്നുള്ള വിവിധ മേഖലകളിലെ പ്രതിനിധികളുമായി ചര്ച്ച നടത്തി
_1733564449_4791.png)
_1665903586_4727.png)
0 Comments