News Details

തിരുവനന്തപുരം: ഇന്ന് കേരളത്തിൽ 6 പേർക്ക് കൂടി കോവിഡ് 19 സ്ഥിരീകരിച്ചതായി മുഖ്യമന്ത്രി പിണറായി വിജയൻ പത്ര സമ്മേളനത്തിൽ അറിയിച്ചു. ആരോഗ്യ വകുപ്പ് മന്ത്രി കെ.കെ.ശൈലജ ടീച്ചർ, റവന്യൂ വകുപ്പ് മന്ത്രി ഇ.ചന്ദ്രശേഖരൻ എന്നിവർ പത്രസമ്മേളനത്തിൽ പങ്കെടുത്തു. തിരുവനന്തപുരം ജില്ലയിൽ രണ്ടു പേർക്കും കൊല്ലം, പാലക്കാട്, മലപ്പുറം, കാസറഗോഡ് ജില്ലകളിൽ നിന്നും ഒരാൾക്കു വീതവും ആണ് രോഗം സ്ഥിരികരിച്ചത്. ഈ ആറുപേരും വിദേശത്ത് നിന്നും വന്നവരാണെന്നും മുഖ്യമന്ത്രി പറഞ്ഞു. തിരുവനന്തപുരം ജില്ലയിൽ രോഗം സ്ഥിരീകരിച്ചവരിൽ ഒരാൾ തിരുവനന്തപുരം മെഡിക്കൽ കോളേജിൽ ഐസൊലേഷനിൽ ചികിത്സയിലാണ്. വീട്ടിലെ നിരീക്ഷണത്തിലുള്ള രണ്ടാമത്തെയാളെ ഉടൻ മെഡിക്കൽ കോളേജിലെത്തിക്കും. കൊല്ലം സ്വദേശിയായ ആൾ തിരുവനന്തപുരത്ത് കൊറോണ കെയർ സെന്ററിൽ നിരീക്ഷണത്തിലാണ്. അയാളെയും തിരുവനന്തപുരം മെഡിക്കൽ കോളേജ് ആശുപത്രിയിൽ ഉടൻ പ്രവേശിപ്പിക്കുന്നതാണ്. എറണാകുളം ഗവ. മെഡിക്കൽ കോളേജിൽ ചികിത്സയിൽ ആയിരുന്ന ഒരാൾ ഇന്ന് നിര്യാതനായി. തിരുവനന്തപുരം ജില്ലയിൽ നിന്നുള്ള ഒരാളുടേയും കോട്ടയം ജില്ലയിൽ നിന്നുള്ള രണ്ട് പേരുടേയും എറണാകുളം ജില്ലയിൽ നിന്നുള്ള ഒരാളുടേയും (വിദേശി) പരിശോധനാ ഫലം നെഗറ്റീവ് ആയിട്ടുണ്ട്. കേരളത്തിൽ 182 പേർക്കാണ് ഇതുവരെ രോഗബാധ സ്ഥിരീകരിച്ചത്. നിലവിൽ 165 പേരാണ് സംസ്ഥാനത്തെ വിവിധ ആശുപത്രികളിൽ ചികിത്സയിലുള്ളത്. 201 ലോക രാജ്യങ്ങളിൽ കോവിഡ് 19 പടർന്നു പിടിച്ച സാഹചര്യത്തിലും കേരളത്തിൽ രോഗം സ്ഥിരീകരിച്ച സാഹചര്യത്തിലും സംസ്ഥാനത്തെ വിവിധ ജില്ലകളിലായി 1,34,370 പേർ നിരീക്ഷണത്തിലാണ്. ഇവരിൽ 1,33,750 പേർ വീടുകളിലും 620 പേർ ആശുപത്രികളിലും നിരീക്ഷണത്തിലാണ്. 148 പേരെ ഇന്ന് ആശുപത്രികളിൽ പ്രവേശിപ്പിച്ചു. രോഗലക്ഷണങ്ങൾ ഉള്ള 6067 വ്യക്തികളുടെ സാമ്പിൾ പരിശോധനയ്ക്ക് അയച്ചിട്ടുണ്ട്. ഇതിൽ ലഭ്യമായ 5276 സാമ്പിളുകളുടെ പരിശോധനാ ഫലം നെഗറ്റിവ് ആണ്.