News Details

നെടുമങ്ങാട്: വൃദ്ധയുടെ കഴുത്തിൽ കിടന്ന മാല പൊട്ടിച്ചെടുത്ത തമിഴ് സ്ത്രീകൾ അറസ്റ്റിലായി. തമിഴ്നാട് മധുര ഉസ്ലാംപെട്ടി കാലിയ തെരുവിൽ മുരുകമ്മ (48) മുത്തമ്മ (42) എന്നിവരെയാണ് മാല പിടിച്ചുപറിച്ചതിന് നെടുമങ്ങാട് പോലിസ് അറസ്റ്റ് ചെയ്തത്. നെടുമങ്ങാട്, ആനാട്, ഇര്യനാട് സ്വദേശി കൃഷ്ണമ്മ (65) നെടുമങ്ങാട് ജില്ലാ ആശുപത്രിയിൽ ചികിത്സക്ക് ശേഷം മരുന്ന് വാങ്ങാനായി ക്യുവിൽ നിൽക്കുമ്പോൾ പിന്നിലൂടെ വന്ന് അടിക്കുകയും കഴുത്തിൽ കിടന്ന മൂന്നേ കാൽ പവൻ തൂക്കം വരുന്ന സ്വർണ്ണ മാല പൊട്ടിച്ച് കൊണ്ട് പോവുകയുമായിരുന്നു. കൃഷ്ണമ്മയുടെ നിലവിളി കേട്ട ആശുപത്രിയിലെ സെക്യൂരിറ്റി ജീവനക്കാരും ചികിത്സക്കായി വന്ന മറ്റ് ആൾക്കാരും ചേർന്ന് മോഷ്ടാക്കളെ ഓടിച്ചിട്ട് പിടിക്കുകയും തുടർന്ന് പോലീസ്സിൽ ഏൽപ്പിക്കുകയായിരുന്നു. പ്രതികളെ കോടതിയിൽ ഹാജരാക്കി റിമാൻഡ് ചെയ്തു.