News Details

കഴക്കൂട്ടം: കഠിനംകുളത്തും പരിസര പ്രദേശങ്ങളിലും ആവശ്യക്കാർക്ക് അതാത് സ്ഥലങ്ങളിൽ സ്കൂട്ടറിൽ മദ്യവും ടച്ചിങ്സും എത്തിച്ചു വന്നിരുന്ന മൊബൈൽ മദ്യ വിതരണക്കാരനെ കഠിനംകുളം പോലീസ് അറസ്റ്റ് ചെയ്തു. കഠിനംകുളം, പുതുക്കുറിച്ചി, പാടിക്കവിളാകം, വാറുവിള വീട്ടിൽ പ്രകാശൻ (55) ആണ് കഠിനംകുളം പോലീസിന്റെ പിടിയിലായത്. കഠിനംകുളം സ്റ്റേഷൻ പരിധിയിലെ പുതുക്കുറുച്ചി, മര്യനാട്, പുതുവൽ കോളനി, കഠിനംകുളം ഉൾപ്പെടെയുള്ള വിവിധ പ്രദേശങ്ങളിൽ മദ്യം വിതരണം ചെയ്തു വരികയായിരുന്നു പ്രതി. ആവശ്യക്കാർക്ക് ആവശ്യപ്പെടുന്ന മദ്യം പറയുന്നിടത്ത് ബാറിൽ ലഭിക്കുന്ന ടച്ചിങ്സ് ഉൾപ്പെടെ സ്കൂട്ടറിൽ എത്തിക്കുന്നതാണ് അറസ്റ്റിലായ പ്രകാശന്റെ രീതിയെന്ന് പോലീസ് പറഞ്ഞു. പ്രതി പിടിയിലാകുമ്പോൾ 8 കുപ്പി വിദേശ മദ്യവും ടച്ചിങ്സും സ്കൂട്ടറിൽ നിന്ന് പിടിച്ചെടുത്തു. ഡ്രൈ ഡേ ദിവസങ്ങളിൽ ബാറുകളും മറ്റു മദ്യശാലകളും അവധിയായതിനാൽ നേരത്തെ സ്റ്റോക്ക് ചെയ്തിരിക്കുന്ന മദ്യം പ്രദേശത്ത് വ്യാപകമായി എത്തിക്കുന്നതായി കഠിനംകുളം സി.ഐ.വിനോദ് കുമാറിന് രഹസ്യ വിവരം ലഭിച്ചിരുന്നു. ഇതിന്റെ അടിസ്ഥാനത്തിൽ പോലീസ് ഉദ്യോഗസ്ഥർ മഫ്തിയിൽ നടത്തിയ തെരച്ചിലിൽ മൊബൈൽ ബാർ ഉടമയെ കയ്യോടെ പിടികൂടുകയായിരുന്നു. കഠിനംകുളം സി.ഐ.വിനോദ് കുമാർ, എസ്.ഐമാരായ അഭിലാഷ്, സവാദ് ഖാൻ, കൃഷ്ണ പ്രസാദ്, സി.പി.ഒമാരായ വിനു, സുരേഷ്, സജി, വരുൺ, ഷിജു എന്നിവരടങ്ങുന്ന സംഘമാണ് പ്രതിയെ പിടികൂടിയത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.