News Details

കഴക്കൂട്ടം: വീട്ടു ജോലിയോടൊപ്പം മോഷണവും നടത്തിവന്ന യുവതിയും കാമുകനും അറസ്റ്റിലായി. മേനംകുളം പുത്തൻതോപ്പ് കനാൽ പുറമ്പോക്ക് വീട്ടിൽ സജീറ (32), കഠിനംകുളം, പുതുക്കുറിച്ചി മുഹിയുദ്ദീൻ പള്ളിയ്ക്ക് പടിഞ്ഞാറ്, തെരുവിൽ തൈ വിളാകം വീട്ടിൽ അൽ അമീൻ (32) എന്നിവരാണ് അറസ്റ്റിലായത്. കഠിനംകുളം പുത്തൻതോപ്പ് സ്വദേശിയും റിട്ടയേർഡ് അധ്യാപികയുമായ മേനംകുളം, പുത്തൻതോപ്പ് വായന ശാലയ്ക്കു സമീപം സീയോൺ വീട്ടിൽ സെലിൻ പെരേരയുടെ വീട്ടിലാണ് മോഷണം നടന്നത്. കഴിഞ്ഞ ഒരു വർഷമായി സെലിൻ പെരേരയുടെ വീട്ടിൽ ജോലിക്ക് നിന്ന ഒന്നാം പ്രതി സജീറ കഴിഞ്ഞ 6 മാസമായി പല പ്രാവശ്യങ്ങളിലായി 15 പവനോളം സ്വർണ്ണാഭരണങ്ങളും വില കൂടിയ വാച്ചുകളുമാണ് മോഷ്ടിച്ചെടുത്തത്. മോഷണ മുതലുകൾ കൂട്ടു പ്രതിയും കാമുകനുമായ അൽ അമീൻ്റെ സഹായത്തോടെ വിവിധ ബാങ്കുകളിലും പണമിടപാട് സ്ഥാപനങ്ങളിലും പണയം വയ്ക്കുകയും വിൽക്കുകയുമായിരുന്നു പതിവ്. അതിനു ശേഷം ഇരുവരും കോവളം, പൂവാർ, വർക്കല എന്നീ സ്ഥലങ്ങളിൽ മുറിയെടുത്ത് താമസിക്കുകയും അവിടങ്ങളിൽ ആർഭാട ജീവിതത്തിനും കാമുകന് ചൂതുകളിക്കാനും മദ്യപാനത്തിനും വേണ്ടിയാണ് ഈ പണം വിനിയോഗിച്ചിരുന്നതെന്ന് പോലീസ് പറഞ്ഞു. കാമുകനായ അൽ അമീൻ കഠിനംകുളം, ചിറയിൻകീഴ് തുടങ്ങിയ സ്റ്റേഷനുകളിലെ മയക്കുമരുന്ന്, കൂലിത്തല്ല് കേസുകളിലെ പ്രതിയാണ്. ഭർത്താവിനെ ഒഴിവാക്കി കാമുകനോടൊപ്പം ബൈക്കിൽ നാടു വിടാൻ ഒരുങ്ങവെയാണ് കഠിനംകുളം പോലീസ് പ്രതികളെ അറസ്റ്റ് ചെയ്യുന്നത്. പ്രതികളെ ആറ്റിങ്ങൽ ജുഡീഷ്യൽ ഒന്നാം ക്ലാസ് മജിസ്ട്രേറ്റ് കോടതി റിമാൻഡ് ചെയ്തു. പ്രതികൾ പണയം വെച്ചതും വിറ്റതുമായ സ്വർണാഭരണങ്ങൾ കണ്ടെടുത്ത പോലീസ് പ്രതികൾക്കൊപ്പം കോടതിയിൽ ഹാജരാക്കി. കഠിനംകുളം പോലീസ് ഇൻസ്പെക്ടർ പി.വി വിനോദ് കുമാർ, സബ് ഇൻസ്പെക്ടർമാരായ ആർ.രതീഷ് കുമാർ, ഇ.വി.സവാദ് ഖാൻ, കെ.കൃഷ്ണപ്രസാദ്, എം.എ.ഷാജി, അനൂപ് കുമാർ, എ.എസ്.ഐമാരായ, എസ്സ്.രാജ, ബിനു.എം.എസ്സ്, സിപിഒമാരായ, സജിൻ, ഷിജു, അനിൽ കുമാർ, വനിത സി.പി.ഒ ഷമീന ബീഗം എന്നിവർ ചേർന്നാണ് പ്രതികളെ അറസ്റ്റ് ചെയ്തത്. കൂടുതൽ അന്വേഷണത്തിനായി പ്രതികളെ കസ്റ്റഡിയിൽ വാങ്ങി ചോദ്യം ചെയ്യുമെന്ന് പോലീസ് അറിയിച്ചു.