News Details

കിളിമാനൂർ: 15 വയസുകാരിയെ പീഡിപ്പിച്ച പ്രതി ജാമ്യത്തിലിറങ്ങി 17കാരിയെ പീഡിപ്പിച്ചതിന് വീണ്ടും അറസ്റ്റിലായി. ആറ്റിങ്ങൽ അണ്ടൂർക്കോണം കലാഭവനിൽ അഖിൽ (അക്കു/23) ആണ് കിളിമാനൂർ പൊലീസിന്റെ പിടിയിലായത്. പിതാവിന്റെ മരണവുമായി ബന്ധപ്പെട്ടും പ്രതിക്കെതിരെ ആറ്റിങ്ങൽ പൊലീസിലും കേസുണ്ട്.പാങ്ങോട് പൊലീസ് സ്റ്റേഷൻ പരിധിയിൽ 2019 ൽ പതിനഞ്ചുകാരിയെ തട്ടിക്കൊണ്ടു പോയി പീഡിപ്പിച്ചതിന് പോക്സോ നിയമ പ്രകാരം അറസ്റ്റിലായ പ്രതി അടുത്ത കാലത്ത് ജാമ്യത്തിലിറങ്ങിയതാണ്. പിന്നീട് കിളിമാനൂർ പൊലീസ് സ്റ്റേഷൻ പരിധിയിലുള്ള പതിനേഴുകാരിയെ വിവാഹ വാഗ്ദാനം നൽകുകയും തുടർന്ന് വീട്ടിൽ കൊണ്ടു പോയി നിരവധി തവണ ലൈംഗികമായി പീഡിപ്പിക്കുകയായിരുന്നുവെന്ന് പോലീസ് പറഞ്ഞു. ആറ്റിങ്ങൽ ഡി.വൈ.എസ്.പി വി.ബേബി, കിളിമാനൂർ സി. ഐ കെ.ബി മനോജ് കുമാർ, എസ്.ഐ പ്രൈജു, ഷാജി, സുരേഷ് കുമാർ, എ.എസ്.ഐമാരായ ഷാജി, പ്രദീപ്, എസ്.സി.പി.ഒമാരായ രജിത്, സുജിത്, വിനീഷ് എന്നിവരുടെ നേതൃത്വത്തിലായിരുന്നു അറസ്റ്റ്. പ്രതിയെ ആറ്റിങ്ങൽ കോടതിയിൽ ഹാജരാക്കി റിമാൻഡ് ചെയ്തു.