News Details

ശ്രീകാര്യം; കഴക്കൂട്ടം: ദുരന്ത നിവാരണത്തിനുള്ള സംസ്കാരം സമൂഹത്തിൽ വളർത്തിയെടുക്കണമെന്ന്
കഴക്കൂട്ടം എം.എൽ.എ വി.മുരളീധരൻ പറഞ്ഞു. ശ്രീകാര്യം ലയോള കോളേജ് ഓഫ് സോഷ്യൽ സയൻസിൽ നടന്ന എൻഎസ്എസ് ആപ്ത മിത്ര പരിശീലന പരിപാടി ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

ദുരന്തഘട്ടങ്ങളില്‍ സര്‍ക്കാര്‍ സംവിധാനങ്ങള്‍ക്കൊപ്പം
പൗരസമൂഹവും ഉണർന്ന് പ്രവർത്തിക്കണം. മനുഷ്യർക്കായി സേവനം ചെയ്യുന്നത് ഈശ്വരസേവയെന്ന് തിരിച്ചറിഞ്ഞ് ഇടപെടൽ ഉണ്ടാകണമെന്നും എംഎൽഎ പറഞ്ഞു.

പ്രതിസന്ധി ഘട്ടങ്ങളിൽ പ്രതികരിക്കാനുള്ള കഴിവ് ആർജിക്കാൻ യുവജനങ്ങൾക്ക് കഴിയണം. നിർണായക ഘട്ടങ്ങളിൽ എത്ര വേഗത്തിൽ തീരുമാനമെടുക്കാൻ കഴിയുന്നു എന്നത് ജീവിതവിജയത്തെ സ്വാധീനിക്കുന്ന കാര്യമാണെന്നും അദ്ദേഹം അഭിപ്രായപ്പെട്ടു.

കേരള യൂണിവേഴ്സിറ്റി എൻ.എസ്.എസ് കോർഡിനേറ്റർ പ്രൊഫ.ഡോ. എ.ഷാജി ചടങ്ങിൽ അധ്യക്ഷത വഹിച്ചു. ചെമ്പഴന്തി ശ്രീനാരായണ കോളേജ് എൻ.എസ്.എസ് പ്രോഗ്രാം ഓഫീസർ ടി.അഭിലാഷ്, കേരളത്തിലെയും ലക്ഷദ്വീപിലെയും എൻ.എസ്.എസ് റീജണൽ ഡയറക്ടർ വൈ.എം.ഉപ്പിൻ, ലയോള കോളേജ് ഡയറക്ടർ ഡോ.രഞ്ജിത്ത്. ഐ.ജോർജ്, ബി.എസ്.ദേവിക, എസ്.പത്മ, ആരവ് അമൽ എസ് കുമാർ എന്നിവർ സംസാരിച്ചു. മെയ് 25 ന് പരിശീലന പരിപാടി സമാപിക്കും.