കഴക്കൂട്ടം: വേനൽക്കാലം കഠിനമാവുകയാണ്. അതിനാൽ വേനലിൽ ഉണ്ടാകാവുന്ന ശാരീരിക മാറ്റങ്ങളും വരാൻ സാധ്യതയുള്ള രോഗങ്ങളും പ്രതിരോധിക്കാൻ കഴിയുന്ന രീതിയിലുള്ള ആഹാരവും ദൈനംദിന ചര്യകളും ആയിരിക്കണം പിന്തുടരേണ്ടത്. നേരിട്ട് സൂര്യന്റെ ചൂടേൽക്കുന്ന രീതിയിൽ തൊഴിൽ ചെയ്യുന്നവരുടെ ജോലിസമയം 11 മണി മുതൽ 3 മണി വരെ ക്രമീകരിക്കുകയാണ് ആദ്യത്തെ പ്രതിരോധ മാർഗം. വേനൽക്കാലത്ത് ശരീരബലം കുറയ്ക്കുകയും ശരീരം വരളുന്നത് വർധിപ്പിക്കുകയും ചെയ്യും. ശരീരബലം കുറഞ്ഞിരിക്കുന്നതിനാൽ ആഹാരത്തിൽ എരിവ്, പുളി, ഉപ്പ് എന്നിവയുടെ ഉപയോഗം വളരെയധികം കുറയ്ക്കേണ്ടതാണ്. എളുപ്പം ദഹിക്കുന്നതും ദ്രവരൂപത്തിലുള്ളതും സ്നിഗ്ധവും തണുത്ത ഗുണത്തോടു കൂടിയതുമായ ആഹാരങ്ങളുടെ ഉപയോഗം വേനൽകാലത്ത് ആരോഗ്യം നിലനിർത്തുന്നതിനും വേനൽക്കാല രോഗങ്ങളെ പ്രതിരോധിക്കുന്നതിനും ഉപയോഗിക്കണമെന്ന് ആയുർവേദം പറയുന്നു. കയ്പു രസമുള്ള പച്ചക്കറികളും ഇക്കാലത്ത് സുലഭമായി ലഭിക്കുന്ന പഴങ്ങളും ആഹാരത്തിൽ ധാരാളമായി ഉപയോഗപ്പെടുത്തണം. മത്സ്യവും മാംസവും വളരെക്കുറച്ചു മാത്രം ഉപയോഗിക്കുന്നതാണ് നല്ലത്. ഗോതമ്പ്, അരി, കൂവരക്, ചോളം ചെറുപയർ, പരി,പ്പ് വർഗ്ഗങ്ങൾ ഉപയോഗിക്കാം. കുടിക്കാനായി തിളപ്പിച്ചാറിയ വെള്ളം മാത്രം ഉപയോഗിക്കുക. കൂടാതെ വിവിധ തരം പഴച്ചാറുകൾ നേർപ്പിച്ചും ഉപയോഗിക്കാവുന്നതാണ്. ഉദാഹരണമായി തണ്ണിമത്തൻ മാങ്ങ, മുന്തിരി തുടങ്ങിയവ. അതു പോലെ തന്നെ പച്ചക്കറികൾ, മത്തൻ എന്നിവ ജ്യൂസ് ആക്കിയും കൂടാതെ മോരിൻ വെള്ളം, നാരങ്ങാ വെള്ളം എന്നിവയും കുടിക്കാവുന്നതാണ്.തിളപ്പിച്ചാറിയ വെള്ളത്തിൽ കഴുകി വൃത്തിയാക്കിയ രാമച്ചമിട്ട് വച്ചിരുന്ന ജലം, നറുനീണ്ടി ഇട്ടു തിളപ്പിച്ച ജലം എന്നിവയും കുടിക്കാനായി ഉപയോഗിക്കാം. സാധാരണ കുടിക്കുന്നതിലും കൂടുതൽ വെള്ളം വേനൽകാലത്ത് കുടിക്കാൻ ശ്രദ്ധിക്കേണ്ടതാണ്. ആരോഗ്യവാനായ ഒരു വ്യക്തി 12 മുതൽ 15 ഗ്ലാസ് വരെ വെള്ളം വേനൽക്കാലത്ത് കുടിക്കുന്നതാണ് നല്ലത്. മലർപ്പൊടി പഞ്ചസാര ചേർത്ത് അൽപാൽപമായി കഴിക്കുന്നത് ക്ഷീണമകറ്റുന്നതിനു സഹായിക്കും. വേനൽക്കാലത്ത് മദ്യവും അതു പോലെയുള്ള പാനീയങ്ങളും ഒഴിവാക്കേണ്ടതാണ്. അയഞ്ഞ കോട്ടൺ വസ്ത്രങ്ങൾ ധരിക്കുന്നതാണ് നല്ലത്. നേരിട്ട് സൂര്യ രശ്മികൾ ശരീരത്തിൽ പതിക്കാത്ത തരത്തിലുള്ള വസ്ത്രങ്ങൾ ആണ് അനുയോജ്യം. വേനൽക്കാലത്ത് ശരീര താപം വർദ്ധിക്കുന്നതിനാൽ ദേഹത്ത് എണ്ണ തേക്കുന്നത് നല്ലതാണ്. പിണ്ഡതൈലം, നാല്പാമരാദി തൈലം പോലെയുള്ള എണ്ണകൾ പുരട്ടി കുളിക്കുന്നത് ത്വക്കിന്റെ പ്രതിരോധ ശക്തി വർധിപ്പിക്കുന്നതിനു സഹായിക്കുന്നു. വേനൽക്കാലത്ത് വളരെയധികം അപകടകരമായി മാറാവുന്ന അവസ്ഥകളാണ് സൂര്യാഘാതവും സൂര്യതാപം കൊണ്ടുള്ള പൊള്ളലും. നമ്മുടെ ജോലി സമയം ക്രമീകരിച്ചു ശക്തമായ സൂര്യരശ്മികൾ നേരിട്ട് ഏൽക്കാത്ത തരത്തിൽ മാറ്റങ്ങൾ വരുത്തിയും ആഹാരം, പാനീയം എന്നിവ യഥാ രീതിയിൽ ഉപയോഗിച്ചും അഭ്യംഗത്തിലൂടെ ത്വക്കിന്റെ പ്രതിരോധശക്തി വർധിപ്പിച്ചും ഇതിനെ പ്രതിരോധിക്കാവുന്നതാണ്. സർക്കാർ ആയുർവേദ സ്ഥാപനങ്ങളിൽ ലഭ്യമായ ഷഡംഗം കഷായ ചൂർണം, ഗുളൂച്യാദി കഷായ ചൂർണ്ണം, ദ്രാക്ഷാദികഷായ ചൂർണം എന്നിവ ഇട്ട് തിളപ്പിച്ച വെള്ളം കുടിക്കുന്നതിനായി ഉപയോഗപ്പെടുത്താവുന്നതാണ് .വേനൽക്കാല രോഗങ്ങൾക്ക് പ്രതിരോധത്തിനും ചികിത്സക്കും ആവശ്യമായ എല്ലാ ഔഷധങ്ങളും ഗവ.ആയുർവേദ സ്ഥാപനങ്ങളിൽ ലഭ്യമാണ്. ലേഖകൻ: ഡോ.ടി.എസ്. ജയൻ, ജില്ലാ മെഡിക്കൽ ഓഫീസർ, ഭാരതീയ ചികിത്സാ വകുപ്പ്, തിരുവനന്തപുരം.

ചൂട്‌ കുറയ്ക്കാൻ ആയുർവേദം (ലേഖനം): ഡോ: ടി.എസ്.ജയൻ