News Details

കഴക്കൂട്ടം: കഴക്കൂട്ടത്ത് നടന്ന വൻ കഞ്ചാവ് വേട്ടയിൽ തമിഴ്നാട് സ്വദേശി പിടിയിലായി. തമിഴ്നാട്ടിലെ ദിണ്ഡിഗൽ ജില്ലയിൽ പെട്ട നിലക്കോട്ടൈ, ബട്ല ഗുണ്ട് ബഥനി സ്ട്രീറ്റിൽ 8/11/16 A യിൽ എസ്.രവിയുടെ മകൻ മുനിയാണ്ടി (25) യാണ് അറസ്റ്റിലായത്. ഇന്നലെ രാവിലെ 10 മണിക്ക് ചില്ലറ വിൽപ്പനയ്ക്കായി 4 കിലോഗ്രാം ഗഞ്ചാവ് ബാഗിൽ കടത്തിക്കൊണ്ട് ഇൻഫോസിസിന് എതിർവശത്തുള്ള സർവ്വീസ് റോഡിന് സമീപത്തു കൂടി വരുമ്പോഴാണ് ഇയാൾ പിടിയിലായത്. മുനിയാണ്ടി തമിഴ്നാട്ടിൽ നിരവധി ക്രിമിനൽ കേസുകളിലും, കഞ്ചാവ് കേസുകളിലും പ്രതിയും തമിഴ്നാട്ടിൽ കഞ്ചാവിന്റെ മൊത്ത വിതരണക്കാരനുമാണെന്ന് പോലീസ് അറിയിച്ചു. തമിഴ്നാട്ടിൽ നിന്നും കേരളത്തിലുള്ള ഇടത്തരം കച്ചവടക്കാരെ സമീപിച്ച് കഞ്ചാവ് വിൽപന നടത്തുകയാണ് പതിവ്. എക്സൈസ് റെയിഞ്ച് ഇൻസ്പെക്ടർ എ.പ്രദീപ് റാവുവിന്റെ നേതൃത്വത്തിൽ നടന്ന പരിശോധനയിൽ അസി.എക്സൈസ് ഇൻസ്പെക്ടർ റ്റി ആർ മുകേഷ് കുമാർ, പ്രവന്റീവ് ഓഫീസർമാരായ രാകേഷ്, സന്തോഷ് കുമാർ, സിവിൽ എക്സൈസ് ഓഫീസർമാരായ ജെസീം, ബിനീഷ്, ഷംനാദ്, സുബിൻ, രാജേഷ്, ദീപു, വനിതാ സിവിൽ എക്സൈസ് ഓഫീസർ സിമി, എക്സൈസ് ഡ്രൈവർ സുനിൽ കുമാർ എന്നിവർ പങ്കെടുത്തു.