News Details

കടയ്ക്കാവൂർ: പ്രവാസിയുടെ വീട് കുത്തിതുറന്ന് 45 പവൻ സ്വർണ്ണാഭരണങ്ങളും, വിദേശ കറൻസി അടക്കം ഒരു ലക്ഷം രൂപയും കവർന്ന കേസിലെ മുഖ്യ പ്രതിയെ കടയ്ക്കാവൂർ പോലീസ് പിടികൂടി. മണമ്പൂർ, പെരുംകുളം, എം.വി.പി ഹൗസിൽ യാസീൻ (19) ആണ് പിടിയിലായത്. ഈ മാസം 6 ന് രാത്രി മണമ്പൂർ പാർത്തുക്കോണം ക്ഷേത്രത്തിന് സമീപം എ.എസ്.ലാൻഡിൽ പ്രവാസിയായ അശോകന്റെ പൂട്ടിയിട്ടിരുന്ന വീടിന്റെ വാതിലുകൾ തകർത്ത് സംഘം മോഷണം നടത്തുകയായിരുന്നു. ഇയാളോടൊപ്പം മോഷണം നടത്തിയ മറ്റൊരു മുഖ്യ പ്രതിയും മോഷണം, കൊലപാതകം അടക്കം നിരവധി കേസുകളിലെ പ്രതിയുമായ രതീഷ് എന്ന കണ്ണപ്പൻ രതീഷിനെ നേരത്തേ അറസ്റ്റു ചെയ്തിരുന്നു. രതീഷിന്റെ കടയ്ക്കാവൂർ, കവലയൂർ ഉള്ള ഭാര്യാ പിതാവിനെ അടക്കം ചെയ്തിരുന്ന കുഴിമാടത്തിൽ നിന്ന് മോഷണ മുതലുകളും കണ്ടെത്തിയിരുന്നു. കൂടാതെ മറ്റു 3 പേരെയും കടയ്ക്കാവൂർ പോലീസ് നേരത്തേ അറസ്റ്റ് ചെയ്തിരുന്നു. മോഷ്ടിച്ച തുക ഉപയോഗിച്ച് വാങ്ങിയ മൊബൈൽ ഫോണുകളും, വിദേശ കറൻസിയും പോലീസ് കണ്ടെടുത്തു. ഇതിന് പ്രതികളെ സഹായിച്ച തൊപ്പിച്ചന്ത റോഡുവിള വീട്ടിൽ സിയാദ്, വക്കം, മേത്തർ വിളാകത്ത് വീട്ടിൽ, സിയാദ്, പെരുംകുളം, എം.വി.പി ഹൗസിൽ സെയ്ദാലി എന്നിവരും പിടിയിലായിരുന്നു. മോഷ്ടിച്ച സ്വർണ്ണാഭരണങ്ങൾ രതീഷും , യാസിനും ചേർന്നാണ് രതീഷിന്റെ കവലയൂർ ഉള്ള ഭാര്യാ പിതാവിന്റെ കുഴിമാടത്തിൽ കുഴിച്ചിട്ടിരുന്നത്. രതീഷിനെ കസ്റ്റഡിയിൽ വാങ്ങി നടത്തിയ വിശദമായ അന്വേഷണത്തിൽ മോഷണ മുതലുകൾ കണ്ടെത്തിയെങ്കിലും യാസീനെ പിടികൂടാൻ കഴിഞ്ഞിരുന്നില്ല. തമിഴ്നാട്ടിലെ മധുര, ഡിണ്ടിഗൽ, സേലം, കോയമ്പത്തൂർ ഭാഗങ്ങളിൽ ഇയാൾ ഒളിവിൽ കഴിയുകയായിരുന്നു. സേലത്ത് നിന്ന് ട്രെയിനിൽ വർക്കല ഇറങ്ങി കടയ്ക്കാവൂരുള്ള ബന്ധു വീട്ടിലേക്ക് പോകും വഴി ഇയാൾ പിടിയിലാവുകയായിരുന്നു. ഇപ്പോൾ അറസ്റ്റിലായ യാസിൻ പ്രായപൂർത്തി ആകുന്നതിന് മുമ്പ് തന്നെ രണ്ട് കഞ്ചാവ് കടത്ത് കേസിലെ പ്രതിയാണ്. അതിവിദഗ്ദമായ അന്വേഷണത്തിലൂടെ മോഷണം നടന്ന് മൂന്ന് ആഴ്ച കൊണ്ട് തന്നെ കേസ്സിലെ മുഴുവൻ പ്രതികളെയും പിടികൂടാനും, മോഷണം പോയ മുഴുവൻ സ്വർണ്ണാഭരണങ്ങളും കണ്ടെത്താനും കടയ്ക്കാവൂർ പോലീസിന് കഴിഞ്ഞു. കടയ്ക്കാവൂർ പോലീസ് ഇൻസ്പെക്ടർ എസ്.എം.റിയാസ്, സബ് ഇൻസ്പെക്ടർ വിനോദ് വിക്രമാദിത്യൻ, മാഹീൻ എ.എസ്.ഐ ദിലീപ്, സി.പി.ഒമാരായ ഡീൻ, ജ്യോതിഷ്, സുജിത് എന്നിവരുടെ നേതൃത്വത്തിൽ ആണ് മുഴുവൻ പ്രതികളെയും അറസ്റ്റ് ചെയ്തത്.