News Details

പോത്തൻകോട്: പത്രം വിതരണം ചെയ്യാനെത്തിയ യുവാവിനെ പോലീസ് മർദ്ദിച്ചു. ശനിയാഴ്ച രാവിലെ പോത്തൻകോട് എസ്.ഐയുടെ നേതൃത്വത്തിൽ പോത്തൻകോട്ട് പരിശോധനയിലായിരുന്നു പോലീസ്. ഇതിനിടയിൽ ഡ്യൂട്ടിയിൽ ഉണ്ടായിരുന്ന ഒരു പോലീസുകാരൻ പത്രവിതരണത്തിന് ബൈക്കിൽ എത്തിയ യുവാവിന്റെ കൈയ്യിൽ കയറി പിടിച്ചു. വാഹനം നിർത്തിയ യുവാവ് പത്രം വിതരണം ചെയ്യാൻ എത്തിയതാണെന്നു പറഞ്ഞെങ്കിലും പത്രവിതരണം നടത്തേണ്ട എന്നും അസഭ്യം പറയുകയായിരുന്നു. തുടർന്ന് കയ്യിലുണ്ടായിരുന്ന ചൂരൽ വടി കൊണ്ട് യുവാവിന്റെ പിറക് വശത്ത് മർദ്ദിക്കുകയും ചെയ്തു. പോലീസിന്റെ ഭാഗത്ത് നിന്നും ഇനിയും അക്രമം തുടരുകയാണെങ്കിൽ പത്രവിതരണം പ്രതിസന്ധിയിലാകുമെന്ന് പ്രദേശത്തെ പത്രവിതരണക്കാർ അറിയിച്ചു. സംസ്ഥാന പോലീസ് മേധാവിയുടെ ഉത്തരവ് ലംഘിച്ച് പത്രവിതരണക്കാരെ മർദ്ദിച്ച പോലീസ് ഉദ്യോഗസ്ഥനെതിരെ നിയമ നടപടി സ്വീകരിക്കണമെന്ന് പത്രഏജന്റുമാരും വിതരണക്കാരും ആവശ്യപ്പെട്ടു.