News Details

മാടൻവിള: പെരുമാതുറ, മാടൻവിളയിൽ വില്പനക്കായി ചത്ത മാടിറച്ചി കഷ്ണങ്ങളാക്കി സൂക്ഷിച്ചത് നാട്ടുകാർ പിടികൂടി. സംഭവം അറിഞ്ഞ് എത്തിയ കഠിനംകുളം പോലീസ് പ്രതിയെ അറസ്റ്റ് ചെയ്തു. മാടൻവിള സ്റ്റേഡിയത്തിന് സമീപം ഇറച്ചി വിൽപന നടത്തുന്ന ഷാഫി (44) ആണ് പിടിയിലായത്. ആറ്റിങ്ങൽ ഭാഗത്ത് നിന്നുമാണ് ചത്ത പശുവിൻ്റെ ഇറച്ചി വിൽപനക്കായി പെരുമാതുറയിലെത്തിച്ചത്. ചൊവ്വാഴ്ച്ച രാത്രി 10 മണിയോടെയാണ് സംഭവം. വിവരം അറിഞ്ഞ പ്രദേശവാസികൾ പോലീസിനെയും ആരോഗ്യ വകുപ്പിനെയും അറിയിച്ചതോടെ പ്രതി ഷാഫി മാടൻവിള കൊട്ടാരംതുരുത്ത് പാലത്തിന് സമീപം മാംസം കായലിൽ ഉപേക്ഷിച്ച് മുങ്ങുകയായിരുന്നു. കായലിൽ ഇറച്ചി ഉപേക്ഷിച്ചതോടെ ആളുകൾ പാലത്തിന് സമീപം തടിച്ച് കൂടി. കഠിനംകുളം പോലീസ് സംഭവ സ്ഥലത്ത് എത്തുകയും ഷാജിയുടെ മകനെ കൊണ്ട് കായലിൽ നിന്നും ഇറച്ചി കഷ്ണങ്ങൾ എടുത്ത് പോലീസിന്റെയും നാട്ടുകാരുടെയും സാന്നിധ്യത്തിൽ കുഴിച്ചു മൂടുകയും ചെയ്തു. ഇന്നലെ രാവിലെ 11 മണിയോടെ ചിറയിൻകീഴ് ഭാഗത്ത് ഒരു മാംസവിൽപന കേന്ദ്രത്തിൽ ഒളിച്ചിരുന്ന പ്രതിയെ കഠിനംകുളം പോലീസ് അറസ്റ്റ് ചെയ്യുകയായിരുന്നു. സർക്കിൾ ഇൻസ്പെക്ടർ വിനീഷ് കുമാർ, എസ്.ഐമാരായ രതീഷ്കുമാർ, ഇ.പി.സവാദ് ഖാൻ, പി.ഷാജി, എ.എസ്.ഐമാരായ നിസാം, ചന്ദ്രൻ എന്നിവർ ചേർന്നാണ് പ്രതിയെ അറസ്റ്റ് ചെയ്തത്.