News Details

തിരുവനന്തപുരം: കോവിഡ് പ്രതിരോധത്തിൽ മുൻപന്തിയിൽ നിൽക്കുന്ന ശുചീകരണത്തൊഴിലാളികളെ ആദരിക്കുന്നതിന് കേരള പോലീസ് സംസ്ഥാന വ്യാപകമായി പരിപാടികൾ സംഘടിപ്പിച്ചു. ബേക്കേഴ്സ് അസോസിയേഷൻ, നന്മ ഫൗണ്ടേഷൻ എന്നിവയുടെ സഹകരണത്തോടെ സ്റ്റുഡന്റ് പോലീസ് കേഡറ്റ് പ്രോജക്റ്റാണ് പരിപാടി സംഘടിപ്പിച്ചത്. സാദരം എന്ന പേരിലാണ് വിവിധ ജില്ലകളിൽ ഇന്ന് പരിപാടി നടന്നത്. തിരുവനന്തപുരത്ത് പോലീസ് ആസ്ഥാനത്ത് നടന്ന ചടങ്ങിൽ ജനറൽ ആശുപത്രിയിലെ 10 ശുചീകരണത്തൊഴിലാളികൾക്ക് സംസ്ഥാന പോലീസ് മേധാവി ലോക്നാഥ് ബെഹ്റ ഭക്ഷണപ്പൊതികളും പലവ്യഞ്ജനകിറ്റുകളും മധുരപലഹാരവും വിതരണം ചെയ്തു. മുതിർന്ന പോലീസ് ഉദ്യോഗസ്ഥർ ചടങ്ങിൽ സംബന്ധിച്ചു. പേരൂർക്കട ഗവൺമെന്റ് മാതൃകാ ആശുപത്രിയിലും ജനറൽ ആശുപത്രിയിലും ഐരാണിമുട്ടം ഗവൺമെന്റ് ആശുപത്രിയിലും ചടങ്ങ് സംഘടിപ്പിച്ചിരുന്നു. ആരോഗ്യസുരക്ഷാ മാനദണ്ഡങ്ങൾ കൃത്യമായി പാലിച്ചാണ് പരിപാടികൾ നടത്തിയത്.